由泰国通 胡慧冲 主持嘅节目《冲游泰国12》已经开始播出，今辑Roger邀请到新拍档 黄紫恩 饰演一对情侣，以故事形式配合节目内容，呢日两位一齐接受《StarTalk》 詹可琳 专访，介绍泰国好去处。
Jojo喺节目化身一位公主病女友，同男友Roger一齐喺泰国吃喝玩乐，最初Jojo知道同Roger合作都好惊，完全冇谂过大家咁夹。讲到节目不断添食，要揾料介绍实在有难度，但Roger就好放心话完全唔担心呢个问题，因为泰国不断都有新地标同商场落成，好似今集佢就会带Jojo去睇蜥蝪，呢个地方好受游客欢迎，Jojo话记得去到当日，Roger同佢讲要小心啲蜥蝪，话口未完Jojo就被蜥蝪尾巴大大力咁拍打，场面搞笑。
节目话咁快就推出十年，Roger好开心节目可以陪伴观众成长，幸好自己都唔算老，而今辑节目亦会有冬荫妹回归介绍特色美食同潮物，仲有冬荫哥哥玩户外活动，内容多姿多采。
之前Roger曾经为节目创作片尾曲《冲歌》，反应叫好，今辑Roger延续精神，并参考周奕玮有个节目叫《周游人生》，于是将新一首片尾曲定名为《冲游人生》，喺短短嘅片尾曲盛载咗好有意义嘅歌词激励人心。
另外，Jojo做艺人之余亦身兼道士身份，佢本来亲手写一道招财符赠给Roger，但几经波折都未能送到Roger手上，佢觉得呢个系天意，会将招财改写第二样祝福送俾Roger，帮佢做场好法事送上幸运祝福。