容祖儿 宣布明年登陆启德体育园主场馆，1月22同23日举行一连两场，《AURA TOUR演唱会》。祖儿上一次于香港举行大型个唱，已系2019年一连举行19场嘅《PRETTY CRAZY》演出，当时无论舞台制作、服装造型定整体演出都令人留下深刻印象。
相隔逾7年时间，终于正式落实全新演唱会消息，随即就引发歌迷热烈讨论。演唱会命名为《AURA》，原意可解作一个人自然散发嘅光芒、气场同能量，但今次演唱会概念中，就唔止系代表一个人嘅状态，而系经过时间、经历、音乐以及人同人之间长久交流后，慢慢累积而成嘅能量。
Joey走过廿多年音乐旅程，由最初最纯粹喜欢唱歌，到走进色彩缤纷、华丽多变嘅舞台世界，再经历唔同人生与音乐阶段，最后重新回到最简单、最本质自己，成为今次佢想表达俾歌迷嘅重要概念。
为呼应演唱会「回归纯粹」主题，祖儿亦选择以最简洁方式呈现海报。于舞台造型上一向敢于突破嘅佢，今次舍弃背景布置装饰，亦未有华丽服饰、夸张首饰，甚至连耳环、戒指亦刻意省略，以近乎素颜感嘅妆容，配合简单大头近照，呈现最自然、放松一面。
拍摄时祖儿时而大笑、时而鬼马、时而安静，未有刻意营造嘅华丽同距离感。虽然团队曾试过唔同服饰、假发同造型，希望寻找更新鲜嘅视觉，但最后仍决定回到最简单的状态。
祖儿本人就以「白粥」作比喻，形容吃尽天下美食后，有时最吸引人嘅，反而系最简单、最原始嘅白粥。睇落未有太多修饰，其实更考验细节，甚至连一条看似简单嘅眼线都反复调整。又笑言：「你唔好以为好易，今次系刻意地做一件好唔刻意嘅事。」