汪明荃 自宣布有意退休，减少幕前工作后，就不时会同老公 罗家英 去睇演唱会、舞台剧，好好享受生日。继日前与友人去睇毛舜筠同林日㬢嘅舞台剧后，阿姐4号晚就陪家英哥出席「家英金秋同乐叙」，与一众粤曲爱好者相叙。
呢晚家英哥除咗开金口为大家唱曲外，大家亦特意准备咗一个数字「80」造型嘅生日蛋糕，为上月22号生日嘅家英哥庆祝80岁生日。照中所见，家英哥身穿笔挺嘅深灰色中山装，颈上系着一条鲜艳嘅红色围巾，显得喜气洋洋，精神饱满。阿姐则穿上来自比利时顶级独立设计师嘅碎花衬衫，陪伴家英哥一同切蛋糕。
蛋糕上除咗有两个象征长寿嘅寿桃外，蛋糕旁嘅黄色生日牌上，更鬼马地写道：「Only You 家英弟弟 生日快乐 70年的知音朋友冼秋白敬贺」，字里行间透漏出两人的深厚感情。
网民睇到照片后纷纷留言送上祝福，祝家英哥生日快乐，身体健康，与阿姐恩爱永远，更有网友打趣道：「希望家英哥能再唱一次Only You！」亦有眼利网民见到家英哥左手手掌贴上纱布，留意希望佢冇大碍。
