出道26年嘅 农夫 即将同 张继聪 合演舞台综艺骚《人夫集团》，C君 同 陆永 由当年嘅「地下Rapper」，凭幽默同口才深得观众受落，成功「入屋」之余，亦成为广告商宠儿。最近佢哋同阿聪推出新歌之余，又为补健品拍摄新一辑广告，期间两人继续以一贯惹笑风格示人，于广告中化身「热量收割机」劲饮劲食，「叹」住拍摄。
陆永 同 C君 一向予人嬉皮笑脸嘅形象，不过随年月渐长，原来各自身体都开始出现小问题：疲倦、面黄、眼黄、有口气等，都对应肝脏可能出现状况，甚至有肝脂超标问题，身型瘦削嘅陆永大感惊讶，仲听C君建议注重健康同开始使用保养品。
开始识保养身体嘅佢哋仲话：「大家可能睇唔出，我哋平时都有做开运动！做咗人夫、做咗爸爸之后，更加注意健康，因为都唔想屋企人担心。健康贴士就系希望大家饮多啲水、瞓多啲觉、玩少啲手机同食啱保健品。其实呢个贴士主要系提醒我哋自己嘅啫。」
广告中农夫演绎一般都巿人陋习，OT挨夜、卧床玩手机外，又狂饮啤酒同劲食炸鸡。不过难得一边工作一边享受美食，佢哋就只感觉到好爽喇：「人生有几多机会系可以一边工作、一边享受美食？呢个广告完全刷新咗我哋对『工作』嘅定义，简直系又正又开心。」
两人为工作同度桥难免会挨夜，最「疯狂」更试过两日只瞓5小时：「屋企人都会担心嘅，但系要做嘢就没办法啦。而家开公司压力有时都有嘅，不过我哋两个人有事就商量解决问题，有压力最后都可以变到冇压力。」
即将开骚嘅仲有其他工作排得密密麻麻，佢哋就话：「希望完骚之后可以放一个大假，不过其实都冇得休息太长时间，因为我哋已经准备要做新专辑。虽然唔知道几时可以做好，但努力希望可以快啲同大家见面。」