邓丽欣 最近推出新歌《已经离我太远》，除赴台湾拍摄MV，更版Stephy主演嘅电影《金都》副导演阿锎执导，加上导演黄绮琳同核心团队操刀，令Stephy扬言此行系「《金都》Re-U」，MV中佢仲尝试唔同造型配合大胆剧情。
Stephy话：「今次系我第一次喺台湾拍MV，而且所有场景、布置同灯光都系非常之特别。唔同嘅场景、唔同嘅男主角仲有道具，令成件事充满电影感。」新歌《已经离我太远》由J.Arie作曲、黄伟文填词、苏道哲编曲兼监制，当然亦系Stephy同Wyman继旧作《不要离我太远》后，相隔逾20年再次合作。
讲到两首歌曲名称间嘅巧妙呼应，Stephy话：「大家听到个歌名可能会觉得有啲熟口面，我之前嘅《不要离我太远》都系Wyman嘅作品。今次佢觉得相隔咁多年再合作，需要纪念一吓，大家都成长咗好多。好开心得到一首主题咁有意思嘅歌，好值得大家细味。」
MV情节故事中，Stephy拥有神奇粉红药水，可以将唱机、吸尘机等电器变成男士氹自己开心。佢就变出按摩暖男、博学健谈者、跳舞型男，但就冇一位令佢心动，于是继续寻找真爱。Stephy指：「最初开会听Story board时，好难将画面同首歌融合，但拍出嚟再细味之后会发现好多心思之处。跳出一般MV嘅套路，好有惊喜！」
Stephy喺MV中嘅唔同造型都令人非常惊艳，发型、妆容到服饰都系佢同团队精心设计，结果非常成功，不过亦同「吓衬」自己。Stephy笑称：「好想做一啲同平时好唔同、令人有惊喜嘅造型。今朝换好晒衫，连自己都吓亲。行落楼下时，问酒店前台姐姐嘢，佢都被我吓亲，好搞笑！」此行更满足佢「食蛋饼」、「按摩」同「休息」愿望清单，工作之余非常尽兴。