邓紫棋 历时3年嘅世界巡回演唱会日前喺深圳落幕，G.E.M.仲宣布演唱会获得「独唱艺人演唱会单次巡回体育场专场数量最多」嘅健力士世界纪录。仲有消息指，G.E.M.喺深圳站举行前，已秘密同拍拖多年嘅富二代造型师男友Mark（魏俊杰）喺纽约低调完婚，G.E.M.经理人公司亦为传闻作出回应。
G.E.M.同Mark自2016年传出绯闻，但直到2018年尾先公开认爱，喺2020年已曾经传出两人喺泰国举行小型海岛婚礼嘅消息。不过G.E.M.经理人迅速否认，仲强调G.E.M.未结婚，唔需要送上恭喜。而到2022年，有内地传媒指两人虽然一度传出分讯，但最终甜蜜复合，强调两人「早已修成正果领证结婚」，G.E.M.工作室之后亦正面辟谣。
但对于呢次传出嘅纽约秘婚一事，经理人公司嘅回应就一反以往态度，只系表示：「艺人的私生活，没有回应。」表现含蓄，同过往态度有极大分别。至于G.E.M.嘅歌迷就对呢次婚讯传闻反应唔算太大，继续沉浸喺演唱会圆满落幕嘅气氛之中。
传闻已成人妻嘅G.E.M.，于深圳站又献唱全新歌曲〈自由的你〉，网路上更极速出现大量AI翻唱同模仿版本，新歌由G.E.M.本人包办词曲创作，制作同编曲则由好友李荣浩操刀，两人首次合作。G.E.M.所讲嘅「自由」，系当科技令愉悦同便利唾手可得，甚至变得不可或缺时，人依然可以真实感受、独立思考，并保有为自己作出选择嘅能力。
佢仲表示录音过程一样非常「自由」： 「自从自立门户做音乐，今次系第一次安安分分做唱作歌手。制作人嘅工作我真系掂都冇掂，完全交晒俾浩哥。真系太轻松、太自由喇！」