任达华、此沙、张兆辉、卢慧敏现身电影首映礼，有份参演嘅著名龙虎武师、刘家良入室弟子何麦喺首映当日因心脏病离世，佢喺离世前三日仍然为电影宣传。
华哥今次嘅角色充满挑战性，佢形容角色拥有极高权力，而且系一个霸道又「狼心狗肺」嘅人，至于辉哥就饰演一个有义气嘅正派老差骨，而且会好识保护自己。
导演孔令政要喺镜头后指挥住影帝级演员，佢都话自己事前要做足准备，首先要抛开粉丝身份，因为几位演技太劲，如果唔系会集中唔到。孔令政仲话可以睇住几位影帝同台演出真系好享受，有时睇睇下个Mon都会太过投入而唔记得嗌「Cut」，佢都好感激得到一众前辈爱锡同支持呢套电影。
此沙可以一次过同多位偶像合作，佢都觉得系一件梦幻嘅事，虽然压力好大，但系好幸福。因为唔系同偶像合照或者拍短片，而系工作合作，系一件好有成就感嘅事。至于Amy Lo喺戏中同一众影帝都有唔少对手戏，佢嘅心情同此沙一样，觉得件事好梦幻，亦从未谂过有一日可以同咁多位偶像合作，仲跟住佢哋学到好多嘢，加上系戏中为数不多嘅女角色，所以都得到好多照顾。
