凭174公分嘅身高同火辣身材以模特儿身份出道嘅 李笼怡 当年推出歌词洗脑嘅《夜游杜拜》攀上事业高峰，更曾因拍瘦身广告展现澎湃身材而被封为一代性感女神。不过因幕前演出被定型「花瓶」同「肉弹」等，佢约2010年前后决定淡出，更卸下光环尝试唔同工作。
其后佢为弥补过去未完成嘅学业积极进修，先后修读中大时装设计同GIA珠宝鉴证课程，随后又远赴英国深造，更考入全球顶尖嘅皇家艺术学院攻读珠宝设计硕士。
近年佢已成功转型成为国际认可嘅珠宝设计师，作品更曾荣获「珠宝界奥斯卡」之称嘅英国金匠工艺与设计大奖（GCDA）银奖，亦受聘珠宝公司从事公关同设计工作，亦积极筹备个人珠宝品牌。 久未公开露面，现已改名为 李宜铮 嘅佢 近日应品牌邀请现身巴黎时装周出席春夏展。
舍旧日Tiifany称号改名Oliviia嘅佢，以一身俐落兼时尚感造型亮相，以源自唐代灵感嘅皮革抹胸，搭配V领蕾丝边丝质长外套，展现出极具层次感风格。 除咗精致造型之外，佢早前于巴黎街头街拍亦同样引人注目。Oliviia换上品牌一袭华丽金色礼裙，于巴黎古典建筑前展现出宫廷浪漫情调。
李宜铮久违亮相时装骚，事前亦做足准，靠跳舞同饮食控制一个月内减足17磅。状态大勇嘅佢令人更期待佢以全新面貌于时尚界同演艺事业上嘅动向。
