罗家英现身代言活动分享日常投资心得，家英哥就认自己喺投资方面比阿姐汪明荃叻好多，不过由于日常开支同医疗费用负担大，所以佢都要继续努力揾钱。家英哥分享，自己接咗两套电影，其中一套仲系同相隔十年冇合作嘅鲍起静合作，而导演就系一位印度人，电影同传统传承以及粤剧有关，所以特登邀请家英哥合作。而鲍姐受邀后，得知有演员阵容有家英哥，佢特别开心，亦唔计较价格，直接答应接戏。
家英哥一向都好识得点样氹阿姐开心，但因为两个人好少戴黄金，所以唔会过时过节买金饰俾阿姐，但会投其所好，买一啲阿姐钟意嘅嘢令佢开心。
10月7号喺家英哥嘅农历生日，大会特别准备咗蛋糕帮佢庆祝，家英哥就话暂时未收到阿姐送嘅生日礼物，但前两日收过西装，唔知算唔算系礼物，因为阿姐冇讲。家英哥表示，每年都有收到一啲好难忘嘅生日礼物，去年就有一张按摩椅，可以喺车用都得，前几年仲收过遥控飞机。至于生日愿望，家英哥就希望世界和平，祖国繁荣安定，香港经济鹏飞，TVB蒸蒸日上，大家都身体健康。
