为纪念新马师曾（祥哥）诞辰110周年，新马派徒弟及徒孙特别举办《纪念新马师曾诞辰110周年好友演唱会》，广州站于8月2号顺利演出，而香港站于10月9日于高山剧场举行一连两场。祥哥徒弟曾慧、彭炽权及黎骏声，以及徒孙司马祥、刘丽、陈觉同郑霭玉上台表演外，仲与祥哥亦师亦友嘅陈飞龙罕有参与演出，更邀请得祥哥大仔邓兆尊出任特邀嘉宾客串做司仪，而祥哥爱女邓翠玉同细仔邓兆荣亦有到场欣赏。
当晚演出前，大会率先举行由新马派嫡系传人、祥哥徒弟曾慧、彭炽权同黎骏声成立以传承新马派艺术为宗旨嘅「新马师曾传人联谊会」举行委任仪式，三人向邓家子女兆尊、翠玉及兆荣派发委任状，邀请佢哋出任联谊会顾问。三位徒弟再联同一众徒孙及表演者，演绎祥哥多首名曲及演出折子戏，客串司仪嘅兆尊以一贯风骚幽默风格，提到点解唔继承衣钵，原来同紥头有关，「我做过好多套戏，由冇对白到有对白都试过，其他嘢可以偷鸡，但系紥头要不断扯住咁紥，真系太辛苦啦」。
当晚曾慧先跟陈飞龙合唱《珍珠慰寂寥》，之后再与徒弟司马祥拍档演出祥哥名剧《仕林祭塔》折子戏。慧姐表示为纪念恩师祥哥筹办三地演出，透露10月澳门站已筹备得如火如荼，陈飞龙热爱粤曲，犹其爱演唱祥哥作品，更视祥哥如师如父，邓家子女对飞龙哥极为尊重。飞龙哥对于祥哥嘅艺术同为人亦赞不绝口，身旁一同接受访问嘅兆尊，对于飞龙哥演绎亡父作品相当欣赏，翠玉赞飞龙哥对亡父好有心：「飞龙哥好钟意爸爸，阿爸一有时间去佢屋企练歌，飞龙哥就会好似个小朋友咁好专心听，阿爸又会每句咁去教佢，飞龙哥都会做到出嚟。」
飞龙哥还主动透露另一件开心事，就是徐蓉蓉撰写的《千面伶王 — 新马师曾》一书，已「进驻」泰国总理府，「我送咗两本书畀桌球手『白旋风』韦特（Jimmy White），泰国总理（陈锡尧）系佢fans，英国读书时经常睇佢打台波，所以请佢去总理府食饭，我就同韦特讲佢系中国人后裔，爸爸一定系祥哥嘅fans，不如你攞本书送畀个总理啦，果然送咗畀总理佢开心到不得了，仲畀咗佢爸爸，就嚟总理府要订书」。
兆尊听到喜讯非常开心，「直情系好激动，Jimmy White都系我偶像嚟，佢又系飞哥嘅好朋友」，翠玉好高兴谓：「阿爸真系好叻，有华人嘅地方就有人识得佢啦！」祥哥桃李满门，艺术成就亦传遍全球华人，兆尊坦承任重道远，于演艺界工作要做得更好，「我不嬲系肩负住呢个责任感喺度，有呢个家族背景，都要安份守己咁去做，但会放松自由自在咁做，唔需要太过拘谨，最紧要跟住初心做好每个工作」。
