吴卓羲（Ron）与张曦雯（Kelly）喺新剧《璀璨之城》饰演两公婆，传二人戏假情真谱出浪漫恋曲，早前出席宣传活动，二人未有否认恋情，笑笑口话想单独约会，亦准备好迎接新恋情，盼望外界给予空间，点知今日剧组释出一条拍摄花絮，揭吴卓羲疑似「心有所属」噃。
型男吴卓羲与女神Kelly呢一对绯闻情侣，一众网民非常受落，更拨行大葵扇，甚至希望二人拉埋天窗，之不过今日上载嘅幕后花絮，片中见张智霖一脸认真，要求剧中嘅家族成员交出手机，誓要查出内鬼！
百厌嘅吴卓羲原来设定咗自己手机wallpaper系同剧老友江美仪嘅超大头相，众人一放低电话，张智霖见到张图即忍唔住笑：「你系要摆江美仪𠮶张喺度。」吴卓羲随后笑著解释呢张相系二人喺大三巴开工𠮶阵，佢亲自帮江美仪影嘅，该相见江美仪斗鸡兼瞪大鼻窿望向镜头。
向来玩得嘅江美仪亦喺社交平台幽默咁回应吴卓羲嘅厚爱， 同时不忘为新剧宣传，「你哋搅错晒啦，吴卓羲其实系暗恋我㗎🤣🤣🤭🤭 星期一晚8点半无线电视翡翠台『璀璨之城』」。
