谭俊彦刘颖旋波友变主持拍档 曾展望一针见血误踩江美仪「地雷」

大型筹款节目《善心满载仁爱堂》将于10月17号晚于翡翠台播出，今次节目有八位主持，当中最有惊喜嘅就系有谭俊彦（阿Shaun）同刘颖旋拍住上，原来二人私底下成日一齐打波，默契方面完全唔使担心，阿Shaun就搞笑话监制好大胆，因为自己老花睇唔清，Tiffany又唔识睇中文，揾佢哋做主持真系好有勇气。

江美仪、朱敏瀚同曾展望呢个《试真D唷》组合都有份为筹款出力，近日美仪姐曝光率飙升，佢预告嚟紧晚晚都可以喺电视上见到佢，17号《善心满载仁爱堂》、18号《试真D唷》，19号开始又有《璀璨之城》正式播出，美仪姐话自己好期待呢套剧力万钧嘅新剧。

myTV Super「试真D团队」打造不踩坑实用游台指南 

朱仔呢排忙住周围飞，又拍节目又登台，仲要抽时间帮好兄弟周嘉洛庆祝生日，不过美仪姐就即场投诉朱仔冇约自己，朱仔补镬话23号《试真D唷》团队会一齐食饭，不过GM一句携眷参加又误踩美仪姐地雷，非常搞笑。

方皓玟当晚担任表演嘉宾，将会演唱新歌，小明仲预告嚟紧有个新project，计划由八岁嘅混血囝囝喺MV男主角，最好阿仔原地出道，自己就可以提早退休。

应届港姐袁丝珩、邓匡闵同李泽欣第一次参与慈善骚，佢哋都话心情好兴奋。Bernice同Ada之前拍咗段Q&A短片，回复网友嘅提问，因为效果唔错，所以佢哋都计划再encore，希望用轻松嘅方式，多啲介绍自己俾大家认识。