许志安第二晚红馆骚邀请李克勤合唱金曲，安仔衷心感谢对方，因为最初诚邀克勤做嘉宾时，克勤知道日子后好直接话自己唔喺香港，更为安仔改机票返港，力证佢哋坚厚嘅友谊。
二人不但合唱金曲，更大谈当年攞「最受欢迎男歌星」嘅往事，重提安仔喺2001年首次夺奖，克勤紧随其后于2002年获奖，两人出道相差一年，当时乐坛竞争激烈。克勤话：「我𠮶时真系唔知除咗四个天神（四大天王）之外，仲可以有其他人攞。你攞完之后，大家先知原来自己都有机会。」克勤希望安仔唔好隔太久先开骚，并承诺安仔下次再开演唱会，自己一定会继续做嘉宾。
到大合唱环节，红馆再次化身超级大K房，连坐喺台下嘅梁咏琪、陈柏宇都同全场歌迷高唱，场面震撼！演唱会尾声，安仔系台上多谢合作单位时，台下嘅观众不断高呼Sammi名字，就喺灯光转换、全场以为佢正准备接著唱歌之际，安仔都补上一句：「多谢 Sammi。」令全场欢呼！随后唱出《我的天 我的歌》。事实上郑秀文为咗力挺老公开骚，连日喺场馆陪伴，屋企人都总动员撑场，夫唱妇随。
