陈家乐 近日推出歌曲《我们都是无名氏》，好多人唔知道，原来佢23年前系参加新秀歌唱比赛入学，当时只得16岁左右，朋友帮佢报名就去试吓，结果幸运地进入16强，不过献唱几句就被叮出局，而其中一位评判就系容祖儿，之后家乐仲胆粗粗走去询问Joey觉得佢唱成点，结果Joey只抛下一句「你大个啲先啦﹗」
家乐比赛之后得到唔少试音机会，不过佢全部都放弃，佢搞笑回忆有一次英皇叫佢去试音，佢又临时甩底，结果收到Mani秘书打电话嚟质问，佢因为唔好意思，所以上咗英皇试音，最后成功签约。家乐话自己原本有机会同陈伟霆一齐成为Sun Boy’z嘅成员，但因为自己练舞过程好沮丧，所以最后放弃歌手路。
隔咗23年重拾歌手梦，家乐话主要系因为个人大个咗，觉得身边有好多人应该要多谢，尤其结婚之后更加坚定呢个谂法，所以先有出歌呢个决定。
家乐对今次嘅作品好认真处理，更有份参与填词，老婆连诗雅虽然赞佢嘅文字优美，但咬字发音方面就会难以演绎，当时家乐都唔相信，一心只系想将啲高深字眼摆落去，又代表到自己嘅故事就可以，家乐仲抵死话因为太太中文唔叻，所以先唔信佢，后尾自己真正入录音室先意识到点解。
之前家乐喺新歌发布会上献唱，佢话呢个宣传对佢嚟讲好吃力，发布会前一晚仲担心到全身冇力，直头好似行尸走肉。直到有个同事同佢讲，将个发布会当成一场戏，而自己饰演嘅角色就系一个好叻嘅歌手，家乐先揾到方法克服恐惧。讲到结婚时曾经对老婆唱《只要和你在一起》，全程因为太感触唱到好难听，所以今次一定要上诉唱多次。
家乐嘅新歌献给一啲曾经帮助过佢嘅人，未来佢会度身订造歌曲俾老婆同阿女小星星，不过就会阿女行先，因为自从做咗爸爸后，家乐见证女儿成长得太快，好想用歌曲去记载父女情，至于太太嘅部分，自己就希望可以创作一首歌由太太演唱，真系谂起都觉得sweet。
