佘诗曼同陈山聪不嬲老友鬼鬼，阿佘仲系山聪囝囝Jaco嘅契妈，仲锡到Jaco㶶，不时就带Jaco到处饮饮食食周围玩。
最近山聪就喺社交平台分享Jaco学踩单车嘅片段，原来系阿佘同陈欣健大女齐齐带Jaco去玩，山聪表示：「仲话明我唔可以去，点知原来两位sister 悉心安排带大佬去学识踩两个辘。」而喺片中可见，Jaco踩得有板有眼，表现得轻松自如，一啲都唔似新手，山聪都好感激两位带囝囝解锁新技能。
阿佘除咗带契仔去玩，佢同山聪以及一班老友都有去欣赏许志安嘅红馆演唱会，阿佘开心Share同安仔、郑秀文等多张照片，唔只多谢安仔令大家有个美丽嘅集体回忆，仲话「Encore嘅时候，大家都唔舍得走，所以我哋继续留喺台底继续一齐唱，一齐high！期待下一次演唱会」，安仔都有留言多谢阿佘嘅捧场。
