许志安一连三场红馆演唱会圆满落幕，尾场当晚全场座无虚席，更有唔少圈中人送上花篮祝贺以及到场支持，包括佘诗曼、梁汉文同太太、苏永康一家，方力申、郑融、彭秀慧、庄思敏、邝美云、陈友等。
嘉宾方面，继之前有陈奕迅、李克勤出现后，呢晚终极大彩蛋就系有歌神张学友助阵。两位神级合唱彼此嘅经典作《我应该》、《一家一减你》，擦出超强火花。安仔自认「核突」向学友表白：「好想见到你，好想同你好近。」
学友主动拖住安仔只手，鬼马回应：「宜家好公开，呢啲冇乜所谓。」学友搞笑举动惹嚟全场大笑。安仔仲话听到学友嘅声音、捉住学友只手令佢觉得好温暖。学友表示安仔演唱会一票难求，自己托咗好多人买飞都买唔到，仲话因为安仔揾佢做嘉宾，先有四张门票。
安仔事后喺访问话，自己好想同学友唱歌，喺公司同事口中得知，学友经常问起自己，所以佢向学友发出邀请时，学友都一口答应，令佢非常感激。
安仔呢次相隔11年再开红馆骚，喺歌单编排上悉心挑选，同大家重温唔少经典作品，其中《唯独你是不可取替》、《彻夜缠绵》勾起唔少人嘅集体回忆。安仔更将红馆变成万人K房，走近观众号召全场大合唱，台上台下打成一片，真系High爆全场。
三场演出圆满落幕，安仔都好唔舍得，除咗感激歌迷们咁多嚟不离不弃嘅支持之外，太太郑秀文连续三晚化身最强跟得夫人，喺后台贴身照顾，安仔都公开多谢Sammi，感谢老婆嚟捧场及帮佢祈祷。
