澳娱综合澳门上葡京综合度假村呈献《璀璨之城》，新剧啱啱推出已经热度爆标，唔单只情节紧凑，剧集仲喺澳门好多景点拍摄，令观众喺煲剧之余又可以欣赏吓澳门嘅风光。好似之前官家同上流社会交流嘅一个大型酒会就见到上葡京内嘅《绿茵胜景花园》、混合中葡建筑风格嘅澳门原咖啡、议事庭前地、仲有著名嘅十月初五街饼店等胜地，逐一喺剧中呈现。
呢集剧组嚟到水上地标澳门皇宫拍摄一场开幕戏，高海宁就对其中一面金色嘅墙特别印象深刻，至于张曦雯就最钟意酒吧场景，除咗整体感觉好高级，所有摆设细节位都做得好靓，完美融合怀旧同摩登两种韵味。
姜大卫（John哥）、张智霖（Chilam）同吴卓羲（Ron）三父子，为咗权斗无时无刻都算计紧大家，两个仔对老窦都不怀好意，尤其系又狠又奸嘅Chilam，John哥搞笑话，Chilam平时睇上去又靓仔又善良，其实额头写咗个「奸」字，不过John哥强调所有指控仅限于剧中，「如果唔系靓靓（袁咏仪）都唔会放过佢啦」。
虽然戏入面三父子勾心斗角，但佢哋私下拍摄时就完全冇呢啲火药味，John哥仲帮两个仔各自起咗个朵，Chilam就系「富贵人家」，因为佢周不时就万岁，至于阿Ron就系「游戏人间」，咩原因大家就自己谂啦！
饰演两夫妻嘅阿Ron同Kelly盛传戏假情真，两位日前现身宣传活动时，对恋情口风一致。原来喺拍摄时，Kelly已经对阿Ron特别有好感，佢大赞有阿Ron喺身边，气氛特别欢乐，完全唔使怕闷，而高Ling就特别多谢Chilam令大家日日有食神。
