容祖儿上周公布明年一月将会喺启德主场馆举行两场演唱会，唔少粉丝都敲碗要求加场，Joey喺10月13日晚突发喺社交平台开 Live，宣布加开一场「真头场」嘅好消息，呢次亦系Joey破天荒未优先订票已先加场，而呢个史无前例嘅决定，完全系想借此报答粉丝嘅支持。
对上一次Joey喺香港举行大型个人演唱会，原来已经系七年前嘅2019《Pretty Crazy容祖儿演唱会》，Joey表示当时曾答应粉丝三年后会再开大型演唱会，但可惜最后等足七年先找数，Joey突然感触落泪，并表示：「系有种好复杂嘅感动系入面，我自己都好感动，我会畀心机，总之今次呢个骚系有好多感情喺入面。」之后Joey更双眼通红，含泪唱出由 林家谦 为佢作曲填词嘅新歌《阳光普照》。唔少粉丝都纷纷留言为偶像打气，「真系前无古人，未开卖就加场，叻女」、「到时一齐唱到喊」、「唔好畀咁大压力自己，你肯开我哋就好满足。」
、「无论几多场，随时赶到」
Joey喺直播期间，亦有一一解答粉丝对演唱会提出嘅疑问，Joey表示呢次个唱嘅舞台设计极具震憾，为顾及全部观众嘅视线，最终拍板采用「三面台」。至于点解会选择加开「真头场」，而非「往后加场」？Joey就解释系因为佢觉得每一次歌手嘅头场，系好需要一班锡佢嘅粉丝喺度交换力量，所以经过一番争取，最后决定加「真头场」。佢又透露而家正筹备紧演唱会周边商品，并会收集大家意见，但就预告一定会推出T恤。
