蔡卓妍 被指近日身材发福，传出同健身教练老公 林俊贤 造人成功。陀B喜讯一出，虽然阿Sa已经否认，不过呢日佢同林峰一齐现身时装活动时，阿Sa罕有著上平底鞋又不时以手遮肚，令喜讯传闻再被提起。不过阿Sa就断言否认有喜，解释著平底鞋同大褛只系品牌提供衣著，双手放肚位置系为咗突显衣著造型，不过阿Sa话呢段时间确实收到几百个恭喜短讯，因为啲人都冇fact check一嚟就恭喜佢。
阿Sa只所以肥咗咁多，原来近日同林峰拍紧套贺岁片，饰演一位冇停口嘅食评人，仲要由朝食到晚，令已经戒咗宵夜多年嘅阿Sa有时深夜都食紧饭，唔怪得心广体胖令佢高呼大镬。
另外，张致恒Steven 喺网上公开自己欠债七位数，而阿Sa正正系佢其中一位债主，阿Sa听到消息都觉得无奈，指身边有朋友早前仍然有帮佢，但睇到新闻话佢仍然冇钱交电费各样，呼吁Steven应该好好思考点样改善生活状况，直指大家唔系欠咗佢，自己对笔欠债已经冇谂过，亦唔想讲太多，每当睇到佢啲新闻时都好心悒。
讲到之前拍摄嘅电影系列终章煞科，林峰都好唔舍得，但嚟紧佢好快就要投入另一啲拍摄工作。而好兄弟 吴卓羲Ron 传出同 张曦雯Kelly 戏假情真，阿峰虽然口口声声话唔知道，但开心嘅笑容就有啲出卖咗佢，更明示希望好兄弟生活可以更平衡，被追问Ron近排有爱情滋润系咪春风得意加红粉绯绯，林峰就话Ron一向都咁得意，平日两人见面都系做运动，充血红粉绯绯。
