戴祖仪、周志康呢日齐齐出席一个护齿活动，啱啱拍完《驱魔速递》嘅Joey，话咁快就染返一头黑发，原来呢个系另一部新剧《超时空男臣2》造型嚟㗎！Joey话呢次虽然有机会延续经典，但系佢就话都几大压力，事关上一辑口碑好好，又好好笑，所以佢都好担心自己应唔应付得嚟，不过有几位前辈傍住，Joey话佢都好安心亦都学到好多嘢呀。
剧接剧嘅Joey感觉越嚟越窈窕，连腰线都出返晒嚟，所以Joey话佢一定要努力keep住呢副body，先可以继续著露脐装示人，不过，Joey话虽然自己瘦咗唔少，之但系块面就仍然系包包面，所以佢都大呻好难瘦面呀。
同样系忙到无时停嘅阿康，嚟紧仲有好多大project等紧佢，虽然忙到无觉好瞓，不过阿康就好enjoy，仲话忙碌得好开心。好快佢就会哥哥周志文一齐开骚，但佢就话唔会成日谂住令自己内耗，反而佢会选择实际啲，同制作组好好商量主题、歌单、嘉宾名单等等，希望投入更多意见，令呢个演唱会更加正啊。
