处境剧《爱・回家之三代同糖》呢日有大事宣布，继第一代《爱・回家》主角 徐荣 之后，《爱・回家之开心速递》嘅三太 樊亦敏 同KC 欧瑞伟 都重磅加盟，当中最开心嘅一定系啱啱做完手术复工嘅 Terry李伟健 喇！
myTV SUPER重温全新处境剧《爱・回家之三代同糖》
樊亦敏喺《爱・回家之三代同糖》入面个角色名叫「龚喜」，性格亦比较跳脱，带畀观众唔少欢乐，而欧瑞伟个角色就继续叫KC，不过中文名就叫「朱基」，系「龚喜」嘅助理。由于拍摄当日KC以一身油漆工人打扮现身，大家信佢个角色同装修有关，但樊亦敏就话大家一定会有惊喜：「今日佢油油啫，但佢听日就唔系油油嘅，佢可能系卖鱼嘅，后日又可能系踩单车嘅，所以你唔知佢助理啲咩嘅。」
樊亦敏同欧瑞伟加盟前，凭住剧组提供嘅剪影同线索，已经喺网上引起竞猜热潮，由于剧组畀出嘅提示，一个系「大只仔好打得」，另一个贴士系「美貌与智慧并重」，所以呢日做访问时，欧瑞伟同Terry把口好似食咗蜜糖一样，氹得樊亦敏相当开心。
近日传出 吴若希Jinny 戏份将会有所变动，车婉婉就话唔知对方几时请假同请咗几耐，但就承认已经拍咗一幕交代Jinny离开嘅戏份，仲话自己当日喊到停唔到。至于讲到樊亦敏同欧瑞伟嘅加入，婉婉就话最重要系要先改口，由「三太」改为嗌「龚喜」，同时亦指佢哋会撞出唔少火花。
提到之前睇 许志安 演唱会时，听到全场大合唱佢同安仔首合唱歌《会过去的》，婉婉直言相当感动。