陈奕迅 入行30周年，宣布12月至明年2月期间，举行26场现场录音演出。有别于以往于大型场馆演出，今次Eason特意将「录音室搬上舞台」，公开俾歌迷见证重录经典专辑嘅过程。唯因场地座位有限，官方抽签发售尚未正式开始前，各大二手购票平台已惊现天价黄牛票，尾场门票更被炒至价钱狂飙逾十倍，引发大批歌迷极度不满。
对于今次选择于只有1181个座位嘅演艺学院歌剧院「录音」，Eason亦亲自喺社交平台揭开背后原因。他感性回忆道：演艺学院俾我嘅第一个印象，就系1989年张国荣嘅音乐特辑《日落巴黎》里面出现过嘅一个场景，记忆犹新。
但讲到最深刻嘅印象，都莫过于系我喺1995年7月16号喺香港演艺学院歌剧院参加第14届新秀歌唱大赛总决赛，我嘅演唱生涯咁就喺𠮶度开始咗。
我想借呢个机会衷心多谢当晚TVB综艺科嘅所有工作人员，当时华星唱片嘅所有同事，当晚八位评审，包括著名指挥家三宝老师、SLUMP爆风乐队主音中野裕之先生、著名音乐制作人小虫老师、著名作曲家林敏怡小姐、YT、著名音乐创作人伦永亮先生、我喺华星唱片嘅第一位音乐监制江港生先生、前无线电视综艺科总经理曾国强先生，俾我嘅肯定，仲有当晚嘅主持人郑丹瑞先生，其他七位参赛者，包括杨千嬅、高杰、滕丽名、许建邦、赖韵诗、王小萍、林迪，同埋现场所有观众俾我嘅热烈掌声同支持，我先至有一个咁好嘅开始。
所以呢个地方，对我嚟讲，意义特别重大。
今次26场演出将现场重新录制《与我常在》、《U87》、《H3M》等多张经典专辑，且每场曲目完全唔重复。由于现场将同步正式录音，所以入场规则极其严格，观众手机必须关机并封存，而演出期间需保持安静亦不可随意拍手欢呼，以将最完美原音呈现。
虽然今次门票安排于10月28日正式接受观众登记，但各大二手二手票务平台已出现大规模黄牛炒卖风气。据报道指12月12号首场门票已被标价至$7996起，而明年2月20号嘅尾场门票更被疯炒至 $13563，比起原价($980~$1280)暴升逾十倍！
由于每场座位有限，加上未抽签已被黄牛攻占，大量歌迷纷纷于网上痛批黄牛猖獗，无奈直言「真粉根本抽唔到」，并强烈要求主办单位考虑实施「购票及入场实名制」，保障真正支持偶像嘅乐迷利益。