邓丽欣 时隔14年再推出个人专辑 ，日前更举行两场唱片发布演出，唔止Fans逼爆现场，多位好友陈健安、蓝奕持 仲有多位曾合作过歌曲MV同电影嘅导演黄绮琳、何妙祺、陈咏燊、伍健雄 同 冯志强 等齐齐捧场，而同门靓仔小师弟 何柏臻 亦帮歌迷戴手带同派发应援物，加上音乐会适逢Stephy生日，现场逾千歌迷为佢庆祝，令气氛更热闹。
音乐会演出分为「过去」、「现在」和「未来」等不同章节，Stephy亦先后演绎新专辑《Tathātā》嘅作品同唔少金曲。当唱到《蓝鞋子》、《他不准我哭》同《不要离我太远》等作品，歌迷就齐齐挥动手灯大合唱。
而两晚演出歌单由歌迷投选唔同sidetrack歌，好似头场《我未愿意》、《念念不忘》，以及第二场嘅《不速之约》同《被遗弃的公主》等。台下歌迷嘅热烈反应仲令Stephy扬言考虑举行sidetrack音乐会。
首场演出当晚同时系Stephy生日正日，台上大屏幕播出歌迷向佢送上祝福片段，陈健安就同Lester鬼马扮工作人员推出生日蛋糕，令Stephy哈哈大笑，说：「公司请啲工作人员咁靓仔嘅，落重本㖞！」呢晚佢又演唱出道初期、第一首包办作曲填词、亦从未公开演唱嘅作品《小红帽》，一开口唱就感触落泪，台下歌迷就挥动手灯为佢打气。到第二晚再次献唱时虽然成功忍泪，不过到最后一曲《仍留在这里》时，全场歌迷大合唱、加上大屏幕播放佢同歌迷嘅昔日合照，加上歌词感人，Stephy结果再次眼泪决堤。
Stephy对两场新专辑音乐会圆满成功非常感动，佢话：「新碟发布会听落好似好简单，但其实意义非常深，相隔咁多年再出碟好感动。做一张唱片好唔简单，除咗要有好歌，仲要加入好多心思。呢张碟记录咗好多我嘅成长、好多嘢装载喺入面。今日同大家一齐分享，𠮶个重量就好似做一场大型演唱会。」Stephy今次应歌迷要求，歌单加入多首sidetrack，她坦言当作为之后开sidetrack演唱会热身。
至于首晚唱《小红帽》时洒泪，佢就指：「呢首歌放喺我第一张唱片，我第一次自己作曲同填词，歌词好励志。唱嘅时候就好似20几年前嘅自己，同而家嘅我对话，被以前嘅自己鼓励，所以唱到某啲歌词、仲要听到台下啲歌迷一齐唱，真系忍唔住。」
而第二晚于音乐会最后一曲《仍留在这里》时再失守，佢就笑言：「无办法，真系好感动，好感谢咁多年支持我，留低陪我嘅人。唔知点解喺台上好眼浅，特别容易触动，平时嘅我好坚强架！」