现年57岁嘅视帝郑嘉颖近年淡出幕前，专心喺屋企做「最强奶爸」，照顾与太太陈凯琳所生嘅三个宝贝仔。向来予人型男形象嘅佢，日前就被网民喺平民两𩠌饭店「野生捕获」，私下极度贴地嘅一面曝光，迅即引起全城热议！
有网民喺社交平台上载咗一张live photo，透露喺人气两𩠌饭店「权发小厨」食快餐时，竟然巧遇男神郑嘉颖。片中所见，当日郑嘉颖身穿简约嘅浅灰色Polo恤及长裤，手持银包排队买外卖。虽然佢戴上太阳眼镜，但凭住招牌清爽短发同保养得宜嘅「冻龄靓佬样」，喺人群中依然星味十足。
呢位网民喺帖文中留言直呼「发梦都想不到」，更笑言自己当场呆咗好几秒，先敢确认眼前人就系经典剧集《步步惊心》入面嘅「八爷」本尊：「原来男神私下真的会来这种平民小店买菜，一点架子都没有，太接地气了。没敢上去打扰，远远看著就已经很满足了～」
唔少网民睇完片后，都赞郑嘉颖全程表现得悠然自得，唔只笑容满面地同店员倾偈，对点菜畀多等动作都相当纯熟，完全冇大明星架子，一睇就知平日成日帮衬，绝对系熟客。又赞郑嘉颖为咗太太陈凯琳而全面回归家庭，担起照顾三个囝囝嘅重任，实属系绝世好老公。
