慈善节目《善心满载仁爱堂》日前圆满落幕，罗志祥（小猪）、谭俊彦、连诗雅（Shiga）、胡子彤、陈宗泽（CY）、尹光、陈奂仁、黄洛妍，应届香港小姐冠军袁丝珩、亚军邓匡闵、季军暨最上镜小姐李泽欣等一众艺人为筹款倾力表演。
小猪打头阵出场唱《高调爱》及《有点爱》，仲落台跟大家近距离接触。连诗雅与Supper Moment主音Sunny合唱《残忍告别式》，讲到老公陈家乐近期正式做乐坛新人，Shiga对老公自弹自唱表现赞赏有加，仲话老公陈家乐拎住结他系型嘅，Sunny话可以大家合作吓，仲问家乐系咪Band仔出身时，Shiga即开口护夫，叫Sunny唔好畀家乐压力。
冯允谦（Jay Fung）同林奕匡呢对好耐冇见嘅老友，一见面就鸡啄唔断，皆因林奕匡升呢做爸爸后，大部分时间放晒喺阿仔身上，少咗机会同Jay Fung打波。林奕匡原本5月返加拿大，因工作安排，佢顺延到暑假先同阿仔返去探亲，阿仔系8月尾生日，咁一家人提早一齐庆祝，笑指阿仔够2岁就要买多一张机票，所以喺阿仔生日前2日就返港，而Jay Fung早前快闪一星期返加国，主要系探望另一半。
方皓玟今年陆续推出两首新歌，出年去宝岛开骚，佢话喺当地出道，隔咗咁多年再去探吓啲朋友，方皓玟觉得好开心，试过有次去当地旅行，见到歌迷接机，方皓玟亦感到好惊喜。
