上星期先踏入52岁嘅 刘恺威 传出新恋情，杂志报道直击佢同现年32岁、身材姣好嘅模特儿兼演员 黎纪君 Christy相恋，两人一齐出席朋友聚会，唔止一碗米线两份食，更手拖手离开度良宵，消息亦随即喺娱乐圈成为热话。
刘恺威近年专注喺内地发展，同内地花旦 杨幂 育有女儿「小糯米」，可惜到2018年两人离婚。之后恺威嘅感情生活就一直都系外界焦点，呢位「黄金单身汉」之后曾同内地女星 李晓峰 高调认爱，两人一度爱得甜蜜，仲多次被拍到同游放闪，甚至传出过婚讯。
不过，呢段恋情最后都系无疾而终。而早前恺威嘅父亲 刘丹 出席活动受访时，不经意间「口快快」爆料，指乖仔同李晓峰早已分手，变相帮阿仔「宣布」回复单身。
点知单身消息传出冇几耐，不过原来刘恺威已再有新恋情。报道指刘恺威同黎纪君因朋友聚会而结识，好快就擦出火花。黎纪君过往喺娱乐圈亦有唔少新闻，曾同王宗尧等男星传过绯闻，外型甜美加上一身骨感身材，绝对系「男神杀手」。
而恋情爆出后，刘恺威同黎纪君回应时亦大方承认恋情，指两人拍拖约一个月，两人有喜爱网球运动嘅共同兴趣，非常夹得来。
唔少网民都大赞刘恺威保养得宜，同年轻嘅Christy一齐完全冇违和感；亦有网民笑言要等丹爷下次出席活动，睇吓丹爷会唔会再代仔爆出关系最新进展㖞。