导演徐克日前出席香港演艺学院颁授仪式，获颁授荣誉博士，以表扬其多年嚟喺演艺业界嘅贡献，好友林青霞以《新蜀山剑侠》嘅瑶池仙堡堡主经典造型献花祝贺。
关锦鹏获颁荣誉院士，阿关谦称受之有愧，关锦鹏话拍电影系做啲自己喜欢嘅嘢，近年喺城大担任客席教授，致力于电影教育与精神传承，佢好想趁呢个机会感恩有幸喺70年代尾、80年代初，喺无线电视菲林组，跟到几位好出色嘅导演许鞍华、谭家明、余允抗同章国明等。
关锦鹏忆述自己系「红裤仔」出身，眨吓眼入行半世纪，有幸同多位巨星梅艳芳、张曼玉、梁朝伟、周润发、金燕玲、郑秀文等合作，自己系好欣赏好钟意，好感恩好开心。
关锦鹏坦言对梅艳芳离开系感到好难过，当年佢跟梅姐、哥哥张国荣有另一个新合作企划，梅姐同哥哥都应承，可惜喺2003年先后离开咗，关锦鹏选择将呢个project搁置，话等于《胭脂扣》有人问佢会唔会重拍，关锦鹏亦问：「边个揾番梅艳芳同张国荣畀我！」关锦鹏斩钉截铁地表明绝不重拍经典作《胭脂扣》，喺佢心目中呢两位巨星传奇地位系无法被任何人取代。