恋爱真人骚《女神配对计划2》近日热播，一众女神嘅感情动向成为全城焦点。当中参选2024年港姐出身、现为《东张西望》主持嘅 俞可程 ，喺节目中展现出真诚又不失主动嘅甜美形象，更喺「心跳电话亭」环节积极大胆向Oswald方智弘出招捍卫地位，唔止落力俘虏求爱勇者，亦令唔少观众同网民大赞佢嘅表现。
外界平时只注意到Kanis嘅外貌同《东张》嘅表现，不过好多朋友都忘记私底下Kanis其实系「真‧学霸」。于城市大学毕业嘅Kanis，入行前已经系一名专业测量师，而令人佩服嘅系，佢参选港姐转战娱乐圈后，依然兼任测量师，更有份参与测量师学会年度晚宴，佢仲指自己唔会放弃呢个身份，系圈中另一名专业人才。
近日就有Kanis旧同事于网上发长文，大爆与Kanis昔日合作时嘅极度敬业真面目。呢位旧同事坦言最初以为「港姐挨唔得」，但Kanis嘅热诚就令佢完全改观。呢位旧同事回忆话，与Kanis 跟进Project 期间，连续三个月由朝早9点做到凌晨12点，当其时Kanis仲同时要兼顾拍摄同测量工作，忙到不可开交。
最令人震撼嘅系，有次喺8号风球高悬下，Kanis朝早返工准备《东张》工作途中不幸撞车入院。但下昼一出院就继续工作，仲话「唔会揼低单嘢唔理」，即刻赶返去继续工作。旧同事透露当时见到Kanis连只手都仲震紧，但依然咬紧牙关坚持，大赞佢：「好努力又有责任感，系一个善良可爱，又十分聪明努力嘅女孩子，值得被更多人睇到同支持！」
既有颜值好身材同时亦有高学历专业资格，仲要抱持惊人嘅敬业态度同责任感，难怪Kanis于节目播出后更得观众喜爱，唔知各位求爱勇者，又感唔感受到佢认真果断嘅优点呢？
《女神配对计划2》星期日晚 20:30 翡翠台