热播剧《璀璨之城》虽然只系刚播出几集，但系剧情既紧凑又峰回路转，勾起观众嘅煲剧热潮。当中 高海宁 饰演嘅Alice洪海允，嫁入官家成为大少奶之后，与饰演官孝君嘅旧情人兼叔仔 吴卓羲 喺屋企见面，孝君仲剖白当年点解拣 张曦雯 饰演嘅Kate王雪莹做老婆嘅缘由。
喺呢幕回想当年嘅剧情中，剧组将 姜大卫 饰演嘅官志琛以AI方式回春，重返中年版样貎，效果更获赞兼撞样梁朝伟。据监制透露，剧组以John哥1996年《再见亦是老婆》嘅对白作声音资料库，再套用现场收录嘅John哥声音频谱，配合AI技术生成效果。另外，John哥喺剧中拎起一张龚慈恩年轻时照片，亦令观众猜测两人关系。
同一集中，两位官家少奶都分别沉船喺孝贤同孝君嘅怀抱中，先系因为呷Alice醋嘅Kate获老公孝君氹返，大派定心丸，两公婆再嚟个甜蜜情深一吻。至于孝贤娶咗Alice入门之后，一直都计划利用呢位完美嘅太太去为自己达成目的。
呢集孝贤就设计一幕英雄救美，令太太Alice真心爱上自己，被封为「极品渣男」嘅考贤话「太完美先系唔完美，弱点其实可以变成优点，利用佢弱点控制佢 」、「喺佢最绝望𠮶刻，先抌个水泡出嚟」、「真假其实唔重要，最重要系结果」，点知孝贤嘅虚情假意果然冧掂Alice，二人仲喺天台相拥睇爱情片。
《璀璨之城》星期一至五晚 20:30 翡翠台