欧阳震华捧周家怡新片场爆笑料 大赞演出《火舞黄沙》变「耀舞长沙」

欧阳震华 呢日罕有现身电影首映礼，力撑老友 周家怡 担正嘅新片，仲指由当年电视台共事已觉得家怡演出功力深厚，不过就因为搞错呢套经典剧集嘅剧名，即场搞出笑话，令全场传媒朋友都爆笑呀。

myTVSUPER重温周家怡《火舞黄沙》精彩演出

虽然Bobby一时大头虾要即场高呼同场嘅家怡问剧名，不过当年呢部重头剧《火舞黄沙》远赴宁夏大漠之地取景，家怡更因兔唇角色杰出表现提名台庆颁奖礼最佳女配角。仲即时勾起两人曾合作嘅《不速之约》，家怡剧中仲暗恋Bobby呀。

至于有冇机会再同剧集最佳拍档 关咏荷 再合作，Bobby指当年娥姐出山拍摄已经非常难得，虽然知道对方仲有戏瘾，不过就首先要有合适剧本，佢本人就无任欢迎非常期待喇。至于最近佢参演嘅网剧同 古天乐 自《美味天王》后再合作，佢就指有如同老朋友见面一样，感觉非常亲切。

重温Bobby娥姐隔世姻缘

担正新片女主角嘅家怡，就笑指希望有机会再同Bobby合作演出，仲笑指今次应该掉转由对方暗恋自己，不过被爆见亲面都失态，家怡就解释话次次饮多两杯就会变得极热情揾水吹所致㖞。