胡定欣 同 陈敏之 呢日现身一个起步礼活动。月初定欣同老公迎嚟结婚一周年纪念，佢表示时间过得相当快，眨吓眼就一年，一周年呢日佢哋无选择大肆庆祝，而系简单咁食餐饭。问到有冇互相准备惊喜？定欣坦言自己冇准备惊喜，而食饭嘅地点亦系老公挑选嘅，佢话本身老公都想保留少少惊喜到当日先畀佢知，但因为定欣话自己想好好dress up一下，所以终于氹到老公提早透露地点。
对于好姊妹 胡杏儿 重返校园攻读硕士一事，定欣就话私底下有同杏儿讲笑，问到方系咪要迈进导演之路，当时杏儿话会努力，希望自己学多啲嘢增进多啲，所以佢哋一众好姊妹听到后，都叫杏儿将来开戏要预埋佢哋。定欣话知道杏儿重返校园呢件事一啲都唔易，除咗一个星期要返几日学外，平时又要照顾小朋友，又要顾及功课，自己好佩服对方。
敏之呢日就带埋囝囝 雷子乐 一齐出席活动，佢除咗经营自己嘅个人channel外，亦忙于发展香水副业，不过敏之都冇忽略囝囝，仲话要同阿仔一齐参与亲子跑步活动。下月19号就系《万千星辉贺台庆》，敏之透露自己将会有一个表演项目，所以而家要努力练习呀。
