香港经典长寿广播剧《十八楼C座》多年来陪伴广大市民讽刺时弊。不过22号就传出令听众不舍嘅消息，喺剧中饰演「周记茶餐厅」后栏洗碗皇后「祥嫂」嘅资深播音员 朱雪梅，宣布荣休。
喺22号播出嘅一集，交代祥嫂将会返乡下陪富婆堂家姐叹世界，而「周记茶餐厅」众人都戥祥嫂开心，而由金刚饰演嘅周老板，就对祥嫂窝心表示：「皇后，如果你喺上面住到闷，想几时返嚟咪返嚟啰。周记咁多年嚟，你都一直帮手撑住。我仲记得，由观塘茶水档开始，你就一直帮我，我都冇亲口同你讲声多谢！记住啦，你几时返嚟，周记都有你碗饭食。」最后祥嫂亦对一众街坊及老周表示多谢。
唔少忠实听众都喺社交平台表示，以后喺剧中再听唔到祥嫂亲切又熟悉嘅声音，实属一大遗憾，不过同时亦为佢感到高兴，祝福梅姐可以好好享受悠闲嘅退休生活。
《十八楼C座》自1973年首播以来，长做长有，系香港广播史上最长寿嘅广播剧之一。而加入商业逾55年嘅朱雪梅，喺1980年代中期加入《十八楼C座》至今，佢曾喺访问中表示自己一生都未做过第二行，整个演艺生涯都系奉献咗畀广播界。虽然喺《十八楼C座》中饰演目不识丁嘅洗碗皇后，但现实中嘅梅姐精通水墨国画，更曾多次为香港房屋协会亲笔提笔，设计贺年利是封。
