方力申 继七年前成功挑战环岛泳后，嚟紧将会再有创举，佢会挑战渡海泳，一路由香港游去澳门，能够令小方有咁大动力，当然同慈善有关啦！
小方话当年为咗游环岛泳，已经有十五年冇游过水嘅佢，特登训练咗一年半去完成呢个环岛泳，佢指完成咗呢件事后，亦令佢重新爱上游水，所以就再无停过一路游到而家。小方细佬正喺一间慈善机构担任主席，而呢个慈善机构服务嘅对象就系基层、有特殊教育需要嘅小朋友，小方话佢细佬同佢讲，话晒而家都做咗爸爸，系咪更加想为下一代做返啲嘢，所以就有呢一次港澳渡海泳嘅创举。
今次港澳渡海泳全程35公里，预计需时要9小时，目标希望筹到一千万嘅善款。虽然游水对小方嚟讲冇难度，不过渡海始终有好多变数，所以点都有压力，小方话最大挑战就系自己老咗7岁，而家练水恢复嘅速度比以前争啲，以前定下嘅目标每日都可以做到，但而家如果当日状态唔得就要练少啲。
小方话可能日子渐近，令佢压力倍增，所以呢排偶尔都会发恶梦，试过梦到个海全部都系鲨鱼。小方指呢次嘅水域虽然应该冇鲨鱼，但都有好多未知之数，例如当日身体状态、会唔会被水母螫伤、中暑、撞到异物等，不过小方就叫大家放心，因为身边有好多专家同团队陪住佢呀。
提到囡囡IsIa，小方就赞囡囡有啲运动细胞，不过自己就唔会强迫囡囡要做女飞鱼，一切都等佢自己拣。小方又分享囡囡学行嘅小习惯，但就呷醋指阿女第一句叫嘅系妈妈，之后叫爷爷，再之后先到爸爸。至于问到会唔会为IsIa添个弟弟或者妹妹？小方就话自己好想，仲话怕隔太耐IsIa会妒忌，不过一切都要讲缘份呀。
