今个星期继续由 王镇泉 为大家送上电影资讯，大家仲记唔记得十年前嘅《蝙蝠侠对超人：正义曙光》？当年呢部电影饰演大反派Lex Luthor嘅演员Jesse Eisenberg凭住呢部戏获得金酸莓奖嘅最差男配角奖，同时令佢演艺事业重创。
最近Jesse Eisenberg接受访问时大方表示因为呢个奖，令好多大公司都冇再考虑揾佢演戏，逼于无奈转换跑道，改行做编剧导演工作，仲话呢个行业好残酷，好多时都系市场去决定去向，幸好佢能够闯出自己嘅路。
另外，六年前专门制作星球大战电影嘅Lucasfilm曾经公开宣布会开拍一部Star Wars外传电影，以全新角色为主轴，仲揾嚟《雷神3》同《雷神4》嘅导演Taika Waititi执导，不过最近导演Taika表示呢个Project已经处于完全搁置阶段，仲用「冰封得好彻底」嚟形容，虽然唔知原因，但Taika目前有四部电影工作在手，估计呢个Project翻生机会应该微乎其微。
本周电影新片速递
《妈样年华》：美圆系个彻头彻尾嘅师奶仔，枯燥主妇生活占据咗佢嘅人生，机缘巧合下，美圆意外踏进五光十色嘅钢管舞世界，展开偷偷瞒住儿子同丈夫学跳钢管舞嘅秘密旅程，生活从此添上色彩。另一边厢，年届70岁、少女心爆棚嘅婆婆凤梅积极用交友app寻找男友，点知遭遇骗局，只好搬入美圆家，为本来已经藏有暗涌嘅许家带嚟更多冲击。
《泥面人》：Matt Hagen 由葛咸城街头小子，一路爬升成为荷里活男主角，事业高峰、万人瞩目、即将获奥斯卡提名，但一名本地黑帮头目行动，令佢严重毁容，被团队抛弃，一无所有。Matt寻找一种尖端纳米科技疗法，奇迹地回复原貌，但奇迹系有代价，纳米粒子不单止修复佢嘅脸容，更放大咗佢内心最原始嘅不安同冲动、伤痛、愤怒、复仇欲。Matt由最初想夺回人生，逐步走上黑暗之路，追捕毁佢一生嘅人。
香港嘅票房龙虎榜，截至10月21日中午，第1位 《我阿爹想旅行》、第2位 《街霸》、第3位 《鲸狱逃生》。
