TVB不时为员工举行运动赛事，加深同事间嘅互动同团体精神。今次举行《TVB爆旋陀螺王》赛事就吸引咗32位同事出战，当中包括罗毓仪（Yuki）、林俊其（Kris）同刘展霆（Eden）等，而监制关文琛亦系选手之一，并且夺得殿军。
虽然一众艺员同事喺16强止步，但系大家玩得极之享受。Yuki落场时，男友Kris亦化身摄影师影战况，吸引大批同事围观。 Kris好兴奋公司举办呢个赛事，有机会与同事切磋一下，而陈颂天形容比赛兴奋愉快，自己都钟意玩陀螺，跟同事玩好开心。
文佐匡就认真搏命，前一日先开工拍完MV，瞓得三个钟就起身为赛事练习；刘展霆就趁比赛带咗一箱珍藏嚟参赛。
陀螺热潮近年可谓一时无两，唔少成年人重拾童年兴趣。Kris分享几个月前陪女友Yuki参加活动，自己好奇试玩，一试就觉得感觉好正，最后忍唔住开始研究继而入坑。虽然Kris同Yuki都会一齐玩，不过佢就话呢啲嘢唔斗得。
陈颂天就好庆幸自己到咁大个人都可以继续玩陀螺，因为呢样系佢由细到大嘅兴趣，又系90后嘅童年回忆。曾锦燊大赞公司非常好，因为上次参加保龄球赛后，佢讲过「如果搞陀螺比赛就好喇」，估唔到公司真系搞咗。
