台庆综艺《试真D唷》播出之后引起热烈回响，江美仪、张振朗、朱敏瀚、曾展望同吴业坤五位主持呢日走入校园，同一众同学仔互动。
五位第一站就去到一间小学，仲试食同学仔同家长一齐精心准备嘅便当。除咗味道得到美仪姐赞赏，仲话便当以精致可爱、用咗蚂蚁公仔作装饰好有创意。
主持团派出坤哥以歌声答谢大家，全场大合唱《阳光点的歌》呢一幕令美仪姐眼湿湿，觉得好感动。振朗幽默表示坤哥呢首歌推出嘅时候，小朋友们都未出世，估唔到大家竟然识唱。美仪姐更发现有同学仔将歌词抄落簿仔对住唱，GM都话坤哥已经升级变「李白」，大家由「从前明月光」变「阳光点的歌」。
同学仔唔只识唱坤哥嘅首本名曲，连《试真D唷》主题曲嘅舞都识跳。最劲嘅系有一位「师傅仔」现身，可以配合主题曲即场耍功夫，睇到大家哗哗声。原本主持团想派出空手道港队坤哥扳回一城，结果坤哥嘅表现令全场爆笑。坤哥事后都话就算五个人一齐跳一只舞，都斗唔过「师傅仔」。
五位主持随后去中学继续试食继续唱歌，气氛一样好热闹！不过开心背后，原来美仪姐全程忍住痛，皆因佢因为打乞嚏太过用力，搞到断咗第六条肋骨，而家连呼吸都喺度痛紧。美仪姐自揭有个坏习惯就系打乞嚏唔会打出嚟，但医生话咁样容易将啲菌留喺身体，仲会将啲力反落去，叫大家千祈唔好学。