刘俊谦 现身汽车活动，佢话自己系悭家精打细算嘅男人，买车以实用为主唔会追款。屋企只系得一架车同太太 蔡思韵 两份揸，不过太太就好少揸车，有时出埠自驾游时，太太就会帮手做领航员，而太太指示好清晰。即使试过行错路，但结果见到嘅风景比原先计划去嘅地方仲靓。
Terrance早前原本要到欧洲工作，但临时变成同太太度蜜月兼庆祝结婚一周年旅行，两夫妻都玩得好开心，佢话今次系心灵之旅，冇乜外出购物，主要到郊外睇风景感受大自然。佢话平时两人工作都忙，难得能够密集式对住一个月非常满足。
成为人夫满一年，Terrance经已学识做人老公嘅求生之道，就系要帮老婆影靓相喇。佢仲直认好有心得，掌握一手好好嘅摄影技巧呀。Terrance话不论任何国藉，喺欧洲都见到男士好落力为女士影相，呢个系好好嘅成长必经之路。
佢又赞太太任何角度都靓，若果啲相影得唔好都唔会闹，不过自己知道影得好唔好，因为太太满意张相时，就会发自内心咁开心，佢就知道继续呢个方向就啱，又话唔系睇太太面色做人，而系太太开心，就有开心人生。