农夫 同 张继聪合演嘅20场综艺舞台剧《人夫集团》，星期日嘅尾场顺利圆满结束。三人于尾场继续同观众疯狂互动，一上台就问大家对《人夫集团》有咩期待？当听到台下有人大叫「除裤！」时，张继聪就风趣回应：「呢度戏曲中心嚟㗎，做啲嘢好艺术㗎！」而6永就话：「我除裤都好艺术㗎，因为我系好抽象嘅，包你哋冇睇过！」
除咗分享人夫日常，佢哋又邀请夫妇观众上台补办喜宴，更为一对「新人」即场炮制「早拍晚播」片段，非常有心思。
到演出尾声时，三人除感谢主办单位同赞助商以及观众捧场外，又互相向对方道谢，农夫大赞张继聪非常包容，唔似拍剧、拍电影嘅「飞纸仔」，佢哋就只得「飞沫」：「我哋纸都冇，净系同佢讲改一只字，不如试吓咁讲，佢都照单全收，真系好多谢佢。」
而身为佢哋太太嘅 谢安琪 同 黄天颐 ，就喺观众席高举「唔好谂住返屋企」Banner，惹来全场哄笑，而阿聪亦顺道宣传明年嘅舞台剧：「反正返唔到屋企，我惟有专心排剧，明年1月剧场再见！」
三位「人夫集团」主脑亦指合作非常开心过瘾，对唔少人提议重演，C君坦言有考虑：「呢个系好适合 Re-run 嘅表演，不过再做嘅时候内容会有啲修改。」6永亦认同：「我哋知有好多人买唔到飞睇唔到，而家未知系开Part 2，定系2.0版，不过内容上点都会有啲改动。」有人提议改到红馆举办，C君就话：「我哋觉得戏曲中心好适合，但系场地个期都好爆，我哋想揾到一个可以同观众多啲互动嘅。」
完成演出后带病上阵嘅阿聪要好好休息：「十几年冇做舞台剧好好玩，但比想像中攰，临开骚前病到失声，好彩一星期好返。原本有个动作系跣住跪地，做到临尾几场感觉膝头有啲怪，就去睇物理治疗。因为膝头撞咗十几场已经瘀、有啲发炎，最尾几场紥住护膝做，不过，物理治疗师话真系好好笑，提议我净系做部分动作。」农夫更笑言阿聪每场表演跪地后，返屋企都要被罚再跪所以比较辛苦。
佢哋觉得每晚同一对夫妻互动嘅环节最感动又惊喜，C君更话头场被一位怀孕的太太感动，因为对方上台已经喊，而佢丈夫亦非常感激弥补当年未能举行婚宴嘅遗憾。至于尾场上台嘅女观众适逢生日同样感动落泪。
问到人夫们完成演出可会获太太奖励？C君就笑言：「我做完仲要打赏我太太，请埋太太去食饭，奖励？冇惩罚就系奖励。」阿聪就卖口乖话：「我做过乜老婆要奖励我？做呢啲系应份嘅，全部酬劳畀晒老婆，仲会多谢老婆畀机会我出去演出。」不过谢安琪曾举牌示意唔准返屋企，佢就话：「我唔知佢今日会举牌，我尽量保持希望。」仲笑言唔入得门就瞓停车场，或者揸车出去兜风。