任贤齐 相隔15年，宣布明年将重返红馆演出，日前佢喺澳门嘅巡回演唱会，面对现场数百香港歌迷高举「下一站红磡」应援牌，终于亲口公布好消息，小齐话：「我申请到明年4月17、18号嘅档期啦！」
小齐呢个早于2023年已经开始；曾于世界各地举行200多场嘅《齐迹》巡演，原定今年年底于北京完成演出，不过如今因为终于成功申请红馆档期，决定将真正压轴终点站留喺香港举行。
小齐上周末喺澳门开骚时，吸引过万观众入场。当晚佢多次走到观众席同歌迷互动握手，而到最受欢迎嘅点唱环节时，现场数百名歌迷突然高举「下一站红磡」应援牌，场面相当壮观。
其中一位香港歌迷成功获得点唱机会，不过佢就反而先向小齐「追数」：「我5岁就已经去睇你演唱会！作为一个香港资深歌迷，我真系想讲，我哋等咗你好耐啦！究竟几时先轮到香港呀？」
小齐就解释自己绝对唔系忘记香港，只系红馆呢个殿堂级场地实在太难申请，多年来屡次入纸都未能成功。佢更随即笑住宣布：「我....终于可以话畀大家知，我申请到2027年4月17、18日红馆档期啦！」令全场即时欢呼雷动。
事实上香港歌迷已非首次要求重返香港开骚，结果小齐经过三年努力，终于成功重返红馆。而原定计划今年底于北京为《齐迹》巡演画上句号，岂料红馆档期获批，整个计划亦随即作改变，将香港成为最终压轴一站。
小齐坦言香港对佢有特别意义：「其实我都算半个香港人啦！由开始拍杜琪峰导演嘅电影，我已经搬嚟香港住二十几年。我一早攞住香港身份证过日子，香港好多地方，可能仲熟过你哋！」佢仲指同事提醒上次喺红馆举行演唱会已经15年前，令佢吓一跳：「吓？有咁耐咩？时间真系过得好快！」
红馆演唱会消息传开后，最令小齐头痛嘅共非演出，而系接电话。佢笑言已经收到过百位朋友要求订飞：「好耐冇试过咁多人打电话畀我！最搞笑系香港啲朋友，以前成日叫我帮手买其他歌手香港演唱会飞，我都话唔可以太多啦，两张、四张好啦！」今次风水轮流转，轮到自己开骚，朋友更立即狮子开大口。
「佢哋话，今次唔系其他人㖞，系你自己㖞！咁系咪终于可以冇限啦？每场留住200张先，之后再加！」小齐听完哭笑不得：「我边度有咁多飞呀？我连几时开卖都未知，公司话等通知呀！」
香港歌迷终于等到红馆，不过台北歌迷就开始不满，纷纷留言问佢几时重返台北小巨蛋，甚至笑指小齐「偏心」。小齐听完又再次苦笑话：「你哋系咪以为小巨蛋我开㗎？一样好难申请㗎！」