香港网球「一哥」黄泽林（Coleman）最近喺体坛大放异彩，其感情生活同样备受外界关注。月初先爆出佢同陈奕迅（Eason）爱女 陈康堤 结束短暂恋情，回复单身嘅 黄泽林 当时声称要专注打波，全力投入赛事。
不过近日前佢出战「广州南沙国际网球挑战赛」（ATP 75级）男单决赛，就被网民发现场边惊见篮球女神 谭旻萱（Mandy）特意北上为佢加油打气，仲有人影到佢哋甜蜜共进早晨，随即传出「挞著」疑云！
据网民所影到嘅动态图所见，黄泽林完成比赛后，Mandy即上前与对方抱一抱，男方亦好自然地于Mandy脸上锡咗一啖，之后先大方与众人齐齐合照。有眼利嘅网民就发现，黄泽林手上拎手机所用嘅蓝色简约手机壳，似乎同Mandy嘅系情侣款式。
喺另一段网民影到嘅片中，就见Mandy坐喺餐厅，见到黄泽林走近时，Mandy即笑得相当灿烂，据指二人食早餐时表现得相当甜蜜。咁啱Mandy喺月中曾PO出关于早餐嘅帖文，其中一张影住自家制早餐嘅组图，其中一张就打上「Wifey materials breakfast」嘅字句，而黄泽林亦有喺呢个post留咗一个「😂」emoji，当时Mandy回复对方：「🫱🏻👍🏻」
另外翻睇二人嘅社交帐号，Mandy同黄泽林喺月中都有出席澳门举行嘅「NBA中国赛2026」，不过就未见二人有同框合照。
唔少网民睇到后纷纷留言热议，指 Mandy 专程去广州应援「绝非一般朋友咁简单」，质疑两人是否正在秘密发展中；亦有粉丝大赞 Mandy 有心支持香港运动员，亲临现场展现满满热血。
