澳娱综合澳门上葡京综合度假村呈献《璀璨之城》剧情相当紧凑，上星期 张智霖 推 姜大卫 落楼梯一幕，就睇到观众心都寒，剧集开播至今话题不绝兼狂吸141万观众收看，演员们都好开心同大家分享喜讯。
张曦雯Kelly、高海宁、陈滢 同 蒋祖曼 仲一齐炮制特饮，可以品尝到Kelly嘅爱心饮品，呢个可以系 吴卓羲 Ron 嘅独有福利喇，Ron仲话明明Kelly冇落糖，但饮起上嚟都好甜呀，搞到身边嘅Kelly笑得相当甜蜜。
江美仪刚刚出场加入「官家」呢个战场，嚟紧就会同新抱Kelly激烈交锋，但估唔到婆媳大战就令到Ron遭殃，Ron投诉Kelly喺镜外偷偷地打咗佢一拳，仲伤心咁反问对方自己错喺边度；Kelly就话因为剧本冇呢场戏，所以佢唯有喺镜头外偷偷地打Ron一拳。Ron心酸话当日场戏已经要畀江美仪掴，戏外又畀Kelly偷偷地打一拳，相当痛心呀。
高Ling同陈滢喺剧中是敌是友嘅关系令人怀疑，呢日睇佢哋喺台上嘅互动似乎有啲玄机，陈滢仲话自己呢日嘅打扮系有原因嘅，西装外套有男性化得嚟又有少少女人味，讲讲下佢仲伸手搂住高Ling嘅小蛮腰，仲搞笑叫大家估下佢哋咩关系。 
之前有传闻指陈滢喺剧中全裸一幕被私下传阅，佢就话自己唔知呢个传闻喺边度传出嚟，佢指知道剧集好多人睇，而剧中又有好多讨论点，陈滢坦言一众演员咁用心拍，都想多啲人讨论呢套剧，亦理解大家会有唔同观点，不过佢直言作为演员拍呢套剧绝对受尊重同保护。
剧集喺澳门唔同地方实地取景，令观众认识到更多打卡位，好似近日剧中张智霖带高Ling去拜祭嘅康公庙，仲有John哥同龚慈恩喺海边漫步计划公司动向嘅科学馆，都系澳门热门景点之一呀！
《璀璨之城》星期一至五晚 20:30 翡翠台