周柏豪 日前举行两场粉丝见面演唱会广州站，两晚现场都座无虚席，柏豪仲宣布11月7号举行嘅澳门生日限定场，门票一开售就被秒杀售罄，主办单位更于旺角弥敦道甜用大型广告祝贺，率先为柏豪送上生日礼物。
广州站一连两日于广州体育馆举行，柏豪一出场就以《12号》拉开序幕，随后再献唱《同天空》、《最好不过》等大热金曲。两晚歌单充满惊喜，柏豪唔止带来新歌《混账》、《纯粹想哭》，又自弹自唱《爱情转移》粤语版，更喺Band Sound环节连唱《金》、《到此为止》同《只有一事不成全你》等歌曲。
柏豪又喺演出前连续两日现身亲自向Fans派花茶，仲低调参观歌迷嘅ColorWalk应援投稿，事后更指非常感动：「每一次去广州开演唱会或者见面会，见到座无虚席嘅画面我都非常感动，亦都好期待下一次再返嚟。上次总共喺广州开咗7场，对我嚟讲系一个非常满意嘅成绩。今次《绽放之章》再次返嚟广州，两晚都玩得非常投入，非常感谢广州站以及所有去过城市嘅歌迷支持。」
而将于11月7号举行嘅澳门站，因为贴近柏豪11月12号生日，门票早被抢购一空。柏豪透露澳门场舞台将有全新设计：「澳门站每次都会有啲唔同嘅嘢发生，今次特别加上延伸台，可以同内场甚至后排嘅朋友更加靠近。流程同内容上亦会同以往有唔同，我自己都好期待。」
提到生日愿望，柏豪就直言随年纪渐长，愿望变得实在：「人长大咗，每一年嘅生日愿望都系希望有多啲时间做自己想做嘅嘢，但最紧要都系自己同身边嘅人身体健康、开心快乐同顺顺利利。细个𠮶阵会谂得好天花乱坠，但现时最基本嘅顺利就系最好。」
柏豪仲预告巡演将一路延续至明年初：「消息指后面仲有一站会去，时间会喺2027年年初。𠮶个地方我以前去过开演唱会，但都一段时间冇去，好期待可以再去同当地歌迷见面。」
明年亦同时系柏豪入行20周年，佢透露目前已有计划密锣紧鼓筹备中：「眨吓眼就20年。2027年我自己会有好多大型计划同企划，希望藉住生日，祝愿2027年所有想做嘅嘢都顺利完成，可以带到更多快乐同惊喜俾大家。」