张与辰 日前到出席马来西亚一个表彰大马华语同方言音乐幕前幕后工作者嘅音乐颁奖典礼，仲获大会颁发「海外杰出表现奖」，能够喺生日前亲自返回家乡马来西亚领奖，令与辰份外开心。
颁奖典礼当晚颁发18项音乐大奖，大会指向与辰颁发「海外杰出表现奖」，系因为佢由马来西亚出发，以创作人实力喺海外发挥光芒，多年嚟不断突破自我，喺演唱同音乐创作以及制作领域亦同唔同嘅音乐人合作，令更多人听见嚟自马来西亚嘅声音。
与辰喺台上表示，第一次喺家乡得到音乐方面嘅奖项，已经系20年前嘅事。虽然期间佢都有喺当地夺奖，但都抽唔到时间亲自领奖，所以可以亲身领奖意义非凡。
事后与辰接受访问时心情依然相当兴奋：「其实马来西亚已经有6年冇举行颁奖典礼，今次有机会返嚟企喺呢个舞台上，真系好开心同埋好感恩，最感恩有咁多支持我嘅屋企人，同埋仲好多身边嘅朋友都冇放弃，一直仍然支持住我。」佢亦感谢自己喺追梦呢二十年都冇放弃过，所以先会得奖。与辰仲承诺会继续努力，希望下次可以攞多几个奖。
与辰喺出席颁奖礼后，第二日喺生日正日就返到香港开工，而晚上就同「与辰同行」嘅一众粉丝开生日会庆祝41岁生日。与辰仲拎埋呢个新鲜出炉嘅奖带到生日会同辰粉分享喜悦，亦形容呢份系最好嘅生日礼物。