香港「网球一哥」黄泽林喺球场嘅成绩令人触目，而佢嘅感情生活近日就同样成网民热话。
黄泽林 今个月14号喺一个直播节目承认，已同Eason爱女康堤分手。不过短短11日之后，就被网民影到，获25岁嘅「篮球女神」 谭旻萱 去广州睇佢比赛，两人仲喺赛后亲暱拥抱，顿时令网民质疑新恋情系无缝接轨。而喺黄泽林嘅新恋情曝光前一日，康堤分手后首度出席活动，就大方回应分手一事。
康堤表示，分手会令大家有一定情绪同埋低落，两个人喺呢段关系中一直专注自己嘅事。至于分手原因同埋系边个提出，康堤就话只可以讲系喺共识下分手，但具体就唔会讲明。
对于旧爱喺直播节目讲分手，康堤觉得大家都有自由同选择要点样面对同表达，而双方亦都分咗手，所以要点样同大家宣布分手，事前都冇特别联络沟通。
康堤父母陈奕迅及徐浩萦一向都爱锡康堤，所以康堤都话爹地妈咪全力支持佢嘅决定，听到有传媒问Eason同阿徐嘅态度系咪同康堤首歌《一律建议分手》一样时，都令康堤忍唔住笑。
