1993年已同哥哥 张崇基 参加新秀歌曲唱大赛加入乐坛嘅 张崇德 ，日前举办入行以来首个生日音乐会，当日现场座无虚席，气氛热闹。Petre兴奋咁话：「今次系我首次举办生日音乐会，除咗香港嘅粉丝之外，仲有来自内地、澳门、加拿大同澳洲等地嘅朋友， 真系非常开心。 」
呢次生日活动， 除咗太太 刘美娟 之外，唔少过往曾合作，好似曾于电影饰演佢妈妈嘅胡美仪， 以及林志美、向海岚、陈康健、孙佳君同汉洋等都有参与。
Peter亦释为入行多年来都未曾举办庆生活动嘅原因：「其实我一直都冇搞庆生活动，系因为我系有社恐嘅，我好怕人多嘅地方，亦好怕大声同噪音。 不过，尖叫声同欢呼声我就唔惊， 而且仲好钟意爱听！ 」搞笑解释令到全场情绪高涨，尖叫声同欢呼声亦此起彼落。
之后佢喺现场乐队伴奏下，演唱超过20首歌曲，更首度演唱由佢一手包办作曲填词嘅全新歌曲《潇洒告别》。另外亦自弹自唱自己唔同作品。历时近3个小时嘅音乐会绝无冷场，而中声3组合CLS（李创伟、善玥澄、陈溢光）同 王郑浚仁 亦到场支持又唱歌助庆。Peter仲同王郑合唱《认错》同《难为正邪定分界》。
事后Peter开心分享：「认识佢哋系因为喺《中年好声音3》担任过团战导师，佢哋都好尊重我，到而家都叫我张老师。一直我都好欣赏佢哋, 所以今次同王郑合唱都好开心。另外，我将会同CLS有音乐上合作，希望可以擦出火花。」
除咗音乐唱歌之外，佢仲预告将会迎接工作上全新挑战： 「明年我将会喺香港一间大学担任讲师， 教授一个硕士课程，真系好期待。 不过， 我仍然会继续音乐上嘅工作，仲希望尽快再办一次Music Live。」
