视帝 谭俊彦 同老婆 任祉妍 近日带住一对仔女举家飞到越南富国岛度假，享受充实而温馨嘅亲子时光，阿Shaun更化身摄影师亲自操刀，为太太同小朋友影低唔少靓相。
任祉妍喺社交平台分享连串度假写真，当中不乏泳衣照。身穿黑色连身泳衣嘅佢，骚出一对修长美腿，虽然佢已经系两位小朋友嘅妈妈，不过身材仍然Keep得好好。任祉妍仲喺限时动态放闪，读老公影相技术一流：「俾大家睇下谭生嘅摄影技术有几劲，我其实有两层楼咁高。」更分享夫妻二人喺沙滩依偎嘅甜蜜合照，隔住个Mon都感受到呢粒甜到爆嘅闪光弹。
而两位小朋友同样玩得开心，尽情享受阳光与沙滩，又同爸爸妈妈一齐叹美食。从一张背影合照可见，两位嘅11岁大女已经系亭亭玉立少女，身高已经到爸爸嘅膊头，完全遗传父母嘅高基因啊！
