蔡卓妍 早前因为拍摄贺岁片日日食宵夜搞到发福，更因此被传有喜。不过煞科后，阿Sa有健身教练老公Elvis帮手密密操练，呢日现身活动时又回复最佳清减状态，重现小蛮腰。
阿Sa就话自己其实并唔系要追求好瘦，只系想练线条，所以拍完戏就冇借口唔健身。佢仲话Elvis非常认真，有一日食完饭就开始捉住佢Mark期，令阿Sa都吓咗一跳。
11月22号就系阿Sa生日，亦系新婚后第一次同老公过嘅生日。阿Sa笑言唔只老公想Mark佢期，好多朋友都想约佢。不过由于电影煞科冇耐，个人都仲有少少攰，有可能一次过庆祝。至于讲到老公会唔会俾惊喜自己，阿Sa就话唔知，仲好幽默叫在场传媒将报导写的大啲添！ TWINS将会喺年底开骚，近日阿娇已经归队一齐宣传彩排做准备，目前令佢哋最难解决嘅系扑飞问题。
阿Sa都话自己嘅飞债系一波未平一波又起，加上老友容祖儿宣布出年开启德骚，所以未处理完TWINS嘅飞，大家又再揾佢订飞。但系佢已同身边好朋友讲好，唔会帮任何人买，因为帮人买飞实在太烦，但而家系同公司嘅Joey开骚，佢都冇办法推，只可以写低咗先，不过最后冇都冇办法。
