任贤齐 日前喺澳门举行巡唱，连唱《对面的女孩看过来》、《伤心太平洋》、《海阔天空》等歌曲，当小齐见到台下有歌迷举住香港红馆应援牌时，佢即刻上前互动，更无预警宣布明年将会重踏红馆嘅喜讯，令全场歌迷震撼又兴奋。
小齐表示，自己每次都Book唔到红馆，但今年终于订到，而且仲系佢相隔15年重返神地开骚。小齐形容红馆对歌手嚟讲系一个好神圣嘅地方，喺𠮶度开演唱会就代表被接受同肯定，所以自己一定会努力。 呢晚小齐嘅澳门站演唱会爆满，加上小齐又唱又跳令观众气氛高涨，佢仲即兴走到台下同粉丝合唱，之后又忆起自己初到香港拍摄电影《星愿》时，因为广东话讲得太差，搞到即使讲感人对白都会令对手张柏芝冇办法演落去，仲会话：「小齐你讲普通话好吗？」，令佢觉得非常唔好意思。
