陈展鹏近年热爱玩社交平台，不时会亲自下场同网民互动，凭贴地幽默形象吸纳唔少新世代成为「好鹏友」。近日就有网民分享，收到煎Pan回复佢两年前发出嘅一封私讯，更因对方一个举动而大感窝心。
事源呢位「好鹏友」喺两年前私讯煎Pan，分享自己中学毕业，将煎Pan喺剧集《城寨英雄》嘅角色「拳佬」画咗喺校服，又表示对煎Pan多部剧集嘅欣赏与支持。两年过去，呢位「好鹏友」本身都预咗个DM已经石沉大海唔会有回复，点知有日佢突然收到煎Pan回复，令呢位「好鹏友」相当惊喜。myTV SUPER《城寨英雄》重温城寨生活
最令呢位「好鹏友」估唔到嘅系，自己同朋友喺几年前因为无聊而开咗一个群组私讯，当时仲加埋煎Pan入群，煎Pan喺回复佢私讯后，竟然逐一私讯群组嘅成员，以「多谢你哋嘅支持，收到晒」以示自己嘅感谢，令收到私讯嘅「好鹏友」不单只感动，仲大赞煎Pan亲切宠粉。
虽然煎Pan好Nice，不过分享呢件暖心事嘅网民都话「大家唔好打搞展鹏呀！🙏🏻🙏🏻小妹当年唔识野喺度玩乱add 佢入group 咋🤣」，有人表示羡慕之余，仲笑言Feel到呢位网民个心跳到「鹏鹏声」。
呢个post炸出唔少同样受过煎Pan回复嘅「好鹏友」出嚟，有人分享自己上年11月私讯过煎Pan，但突然喺上个月收到「最近好吗？」嘅回复兼问候，又有偶遇过煎Pan一家嘅网民分享合照，赞煎Pan同太太单文柔有礼貌同亲切。睇嚟煎Pan可以拥有咁多00后、10后嘅新一代「好鹏友」，都唔系冇原因！
