刘松仁享受写意生活，不时会喺社交平台分享昔日点滴，松哥㖊日（28号）就以「沉默是金」为题畅谈往事。
松哥话早年喺台湾同杨佩佩合作𠮶几年，唔知点解除咗佢之外，通常都会配上一位香港女演员，松哥话由于自己喺演艺界资历较深，人亦比较老，所以喺演戏同做人方面都比较老土。
讲到女演员初到台湾演出电视剧，难免喺剧组同新嘅生活环境中，喺适应上遇到困难。松哥就觉得自己责无旁贷，加上性格使然，觉得有义务畀佢哋一定嘅意见同照顾。
松哥喺文中仲鬼马地自问自答：「我系唔系好色，借此接近佢哋，就不得而知？『人』难免总会自欺欺人 ! ! !」之后佢又分享有次遇到一位香港女演员，向佢请教咗一个问题「若果遇到别人在报张上恶意对你非议或攻击，你会怎样回应？」当时松哥就表示一般佢都系唔回应。
松哥解释见到呢种报道，要做到保持平静同无反应谈何容易，佢话：「自己知自己事，尤其系我呢种火爆性格，无反应就假嘅。我又点会按耐得住！所以我通常尽量采取鸵鸟政策，唔去睇呢啲八卦新闻，唔畀自己心情同有机会起起伏伏。」
松哥嘅观点系一个钟意背后讲是非、评击或攻击他人嘅人，久而久之一定会树敌众多，变成一个「是非者」。而喺呢个圈子，唔畀心思同努力工作，通常好快会消失，因为观众眼睛系雪亮，最好证明，系智者看结果，而佢相信同信仰嘅系积口德。佢喺帖文写道：「藉著这件事，每一件事，每一个经历，经营自己。怎样做人、怎样处世、怎样修养、修为自己，尽量不受外界干扰，好好经营个人的格局，默默走自己的路。」
